साउदी अरबिया, २२ असार । वैदेशिक रोजगारका लागि साउदी अरब पुगेका चन्देश्वर मुखियाको उपचारमा दुई करोड ३० लाख रुपैयाँ खर्च भइसक्दा पनि अवस्था जस्ताको तस्तै छ ।
दुर्घटनामा परेर गम्भीर घाइते भएका उनलाई गत डिसेम्बर २८ मा साउदीको दमामस्थित मौवासात अस्पतालमा भर्ना गरिएको थियो तर उनी अझै पनि आईसीयुमा बेहोस अवस्थामै छन् ।
"उपचारमा दुई करोड ३० लाख रुपैयाँ अर्थात (१० लाख रियाल) खर्च भइसकेको छ, तर अवस्थामा कुनै परिवर्तन भएको छैन," गैरआवासीय नेपाली संघ, साउदीका अध्यक्ष धरम केसीले भने ।
उनी इमार अल हदिद कम्पनीमा कार्यरत थिए । उक्त सबै खर्च त्यही कम्पनीले गरेको हो । अहिले सम्मको खर्च रोजगारदाता कम्पनी र बिमा कम्पनीले गरेता पनि अब थप बेहोर्न नमिल्ने जानकारी दिएको छ । उनी युनिक ओभरसिज म्यानपावरबाट गएका हुन् ।
